童年時看《幪面超人》，印象最深刻是隨傳隨到、全車青綠的「蝗蟲一號」。長大後電單車見得多，但只有它勾起我對「蝗蟲一號」的回憶。當然這輛翻版「蝗蟲」唔會聽到主人喚叫便飛撲出來，但至少車主將一輛外形平實的KawasakiZephyr750不斷升呢，更叫人吃驚的是這輛電單車，竟有19年歷史，搶眼程度，絕對拍得住「蝗蟲一號」。
記者：趙慧敏
攝影：周旭文
Model：Seacole@PureModels
講到Kawasaki，喺香港捧場客絕對唔少，尤其是KawasakiZephyr，更加係受歡迎型號，不過講到外形，KawasakiZephyr始終係較典型設計，花巧實無佢份，所以喺香港，不少用佢嚟傳遞文件。呢款喺八十年代中期生產嘅車款，正值各電單車廠紛紛設計仿賽車外形的電單車時推出，市場對簡約設計的KawasakiZephyr，反而覺耳目一新而大受歡迎，就算今時今時已經停產，但喺日本仍然受到潮人追捧，KawasakiZephyr專業改裝車書更加係唔少，點樣將架車執到靚一靚，都巨細無遺話晒你知。就好似呢架KawasakiZephyr750，1991年出廠，大大話話有成19年歷史，差啲同80後有得揮，不過如果喺街見到，任你點估都估唔到佢真實年齡，點解？咁絕對多得車主Edwin多年來不斷喪改。
專訂日本改裝件
Edwin於零二年以萬多元購入這車，當年的車形仍保持原裝味道，Edwin隨後不斷改裝，前前後後花上近五萬元，務求令車款煥然一新。首先將原來紅色的車身換上青綠色，由於早年網上購物仍未盛行，他特意訂購日本改裝車雜誌搜集資料，並訂購特別的零件，當中包括四出二出一的日本MID-KNIGHT死氣喉。另外為保持運作良好，又將原來較細的油冷改為較大的Active油冷排及散熱片；為增加掟彎穩定，在車頭裝上HIGHWAYSTAR頭Fork、頭尾Brake鋼喉等等。雖然這架車年屆十九，並沿用直四DOHC8引擎，相比起現時，當然算不出高性能，但由於保養得宜，行駛時依然十分暢順。不過始終是老人級數，「老人病」自然少不免，Edwin現時除了閒時駕出來操一操外，大多數時間都作欣賞用，除此之外亦要面對另一個問題——油費太貴。以這輛只有68匹馬力、重200公斤的車身，原來油費高達$1.5/公里，油費閒閒哋貴過1,800cc房車。
KawasakiZephyr750
引擎：738cc直四DOHC
馬力：68ps/9,500rpm
扭力：5.5kgm/7,500rpm
傳動：油壓濕式多片5速鏈傳動
