英格蘭國家隊門將羅拔格連喺上周六對美國時嘅牛油手，令佢近日成為傳媒焦點；最新消息係現效韋斯咸嘅佢，原來唔單止接波接唔穩，連女朋友都一樣留唔住，喺世界盃展開前同法裔加拿大籍內衣模特兒明妮（ElizabethMinett）分手。都唔知格連係咪因為咁而分心，搞到佢喺球場上錯漏百出。
30歲嘅格連據講自小讀書成績唔錯，喺12年前放棄學業而全身投入職業足球運動之前，修讀過法律同心理學，絕對唔係波牛一名；就算佢成為職業足球員之後，亦不時會寫吓詩，仲籌備緊寫小說，又打算他日掛靴之後投身體育記者行列。
不過，喺揀女朋友方面，佢就走唔出足球員嘅框框，都係鍾意樣靚身材正嘅美眉，喺同明妮拍拖之前，就曾經同模特兒莎拉一齊10年，之後又搭上過名媛艾瑪。
喺08年當格連隨韋斯咸到加拿大比賽時，佢就認識咗身高5呎10吋、上圍有35C嘅金髮藍眼模特兒明妮，明妮仲好快搬咗嚟倫敦同格連同居㖭！喺兩個月前，23歲嘅明妮接受訪問時話：「我好期待到南非為格連打氣，而為咗尊重佢嘅私隱，我哋打算到時全程用法語交流！」
「三間」否認個波太飄
點知言猶在耳，兩人突然喺世界盃展開前分手，明妮仲搬離格連屋企，飛咗去紐約暫住；一名知情人士話：「格連不知幾咁掛住明妮，又不斷喺度諗如果兩人仲繼續一齊有幾咁美好，今次情變對佢打擊真係好大。」唔知係咪因為咁，搞到格連喺對美國場波慌失失，搞到牛油手出醜！
當然，格連經理人梗係否認兩件事有關連，又話格連係職業球員，唔會公私不分。另外，世盃專用皮球製造商「三間牌」亦否認格連今次犯錯，同個波太輕太飄有關。總之，格連好自為之啦！
英軍失W博彩公司賺多1.1億
未必人人都討厭「牛油手」，有外國博彩公司就因為羅拔格連對美國時撥皮球入自己網窩，而多賺了至少1,000萬鎊（約1.1億港元）。英格蘭首戰因格連的失誤而被美國逼和1:1，立博發言人夏普賽後說：「由於羅拔格連這一球，令我們從那些支持英格蘭的人身上多賺至少有1,000萬鎊。」
FanZone
當年今日：15/06/1986
比利時足球史上的代表作，與蘇聯合演入球騷後終以4:3力克對手入8強；蘇聯前鋒貝倫諾夫該役大演帽子戲法也屬徒然。
句句金
加納前鋒基恩：「我們在進攻前，必須先做好防務；06年那一屆賽事，我們就是沒有這樣做。」
有數講：5
今屆世盃賽事在南非的10個地點舉行，其中共有5個比賽場地為新建成；其中上演揭幕戰與決賽的「足球之城」便為新建成的球場之一，其外形以非洲傳統陶器作為建築概念。