經常喺民間發聲嘅民陣前召集人孔令瑜，前日喺城大一個研討會上，話白鴿黨用民調做擋箭牌，政改立場左搖右擺，一時㷫起發炮鬧白鴿黨「仆街」，即時被人大做文章，捉住呢兩個字話佢粗口橫飛勁爛口。
單嘢見報後，本身係天主教正義和平委員會幹事嘅佢百詞莫辯，俾啲教友鬧到半死。
雖然「仆街」一定唔係斯文用語，但前年長毛喺立法會內講「仆街」，主席曾鈺成都唔夠膽話呢兩個字係粗口，啲做文章嘅人憑乜嘢話呢兩個字係粗口？定係道德潔癖兼《說文解字》上身？老實講，八方覺得孔令瑜都幾有品，話晒仆得街嘅，都仲算係人，其實某啲團體，連俾人鬧呢兩字都唔配。