全城投入世界盃，八方當然唔例外，晚晚捱更抵夜精神已經唔好，仲要場場波俾啲嗚嗚聲係咁轟炸。講緊嘅係南非特色樂器Vuvuzela，呢支成米長嘅喇叭真係唔講得笑，吹到最響有成131分貝，等於一架開行Turbo嘅一級方程式咁嘈，幾萬人一齊吹分分鐘耳聾，聽講一班球星好似C朗已經開聲講，話支「嗚嗚」搞到佢哋分心，要大會禁用。
搵定資料點吹
有高登網友就提議，嚟緊6.23包圍立會之日，一班巴打齊齊班支「嗚嗚」到場，幾千人一齊對住立法會吹，搞到班保皇黨同高官有得震冇得瞓。呢個建議唔少網友都賜酒支持，話會去某快餐店食個餐加錢換「嗚嗚」，不過大家始終唔係非洲人，有啲擔心吹唔響。有網友搵定資料，話支嘢唔似中國管樂，發聲原理係口腔內震動，所以吹嘅方法係上唇完全貼住支管，下唇就留番小小位去震，咁少少氣就可以吹到鬼咁響。
或短暫性失聰
八方喺度想提吓各位，如果真係幾千人吹，立法會裏面肯定聽到，不過你自己都肯定會短暫性失聰，亦唔知啲警察會唔會話你製造噪音或「襲警」拉你。