水上樂園返嚟喇！大家細個時同朋友仔着住泳衣泳褲，走去海洋公園玩五彩天梯，滑落去大水池，真係令人懷念。同事明明竟然冇去玩過，連阿貴都話佢冇童真。
小妹同海洋公園啲公關老友茶敍，八到佢哋今年夏水禮最新活動，可以話係變種水上樂園，因為佢哋喺大樹灣廣場，搭起一個有全世界最高、最長嘅充氣滑水梯，大家可以由11米高急速滑入54米長嘅滑道，最尾唔係衝落水池，而係慢慢減速，由於全程都有水，肯定會玩到濕晒身，大家要着定泳裝或短褲等。
槍戰水世界搏鬥狙擊神
如果小朋友唔夠膽，可以玩高7米、長28米的迷你版冲天滑水梯。另外，仲有面積超過一萬平方呎嘅槍戰水世界，大家要攞住水槍，同神出鬼沒嘅狙擊神搏鬥，四周仲有水彈機關㖭。
唔想自己濕身，可以睇人哋濕身，嚟自北美同歐洲嘅世界級跳水高手，會喺24米高嘅高台跳落嚟，完成花式旋轉及凌空翻騰，另外仲有跳水高手表演火燄跳水。其他表演包括勁歌熱舞泡泡池，大家可以喺泡泡中起舞。海洋公園夏水禮，將會喺7月1日至8月31日舉行。
電郵：mailto:[email protected]