民主黨范國威（Gary）設計嘅新普選火鳳凰tee，原來早喺六四集會當晚已火速售罄，只剩下小量存貨。有見反應熱烈，加上唔少市民致電民陣查詢，民陣決定加推黑色限量特別版，每件盛惠80元。
Gary透露，早前獲一名女網民自薦做普選teemodel，相片上載網站facebook之後，即時引嚟唔少網民討論，唔少人讚個model靚女。Gary透露，呢位靚女姓鄭，網上別號「小百合」，當日唔使半個鐘就完成拍攝。有政圈中人透露，「小百合」過去現身唔少社民連活動，有人笑稱佢係「社民連鄧麗欣」。
何解件tee咁貼身？Gary話小百合件tee係細碼，只係想拍得潮啲，相信有助谷起件新普選火鳳凰tee喎。