區政府機器發茅力谷政改爛方案，煲呔噚日仲鬼祟落區，以為可以瞞天過海，堂堂特區之首淪落至此，八方真係無話可說。好彩，每次香港民主到了最危險嘅時候，網民都會發出最後嘅吼聲。
有高登友已經發起籌錢登廣告，呼籲市民反對政改方案。據70後發起人「想習膠71見」講，家已經籌到21,000大元，其中15,000蚊已收咗錢，反應之快速同熱烈，係高登前所未有。
不滿民意被官員強姦
五年前政府推出05年政改方案，「想習膠71見」第一次籌錢登廣告反政改方案，早排佢將當年個討論放上高登畀班巴打回味吓，點知大家對今次政府假政改好不滿，尤其係官員玩弄民調數字強姦民意，更擔心普選聯出賣香港人嘅真民主，於是提議再籌款。
「想習膠71見」身在美國，唔熟廣告設計，又冇銀行戶口畀大家入數，時間好趕，但大家討論咗30分鐘，反應已超熱烈，於是佢「膽粗粗開post，希望在高登能再創奇蹟」。諗唔到，24小時內大家認捐咗萬五蚊，48小時後，認捐嘅巴打已有50幾個，善款數字達到21,000大元，已收捐款亦達15,000元，破咗喺高登籌錢登廣告嘅紀錄，「代表大家對6.23反政改有熱誠和明白那緊迫性」。
「想習膠71見」好感性咁同八方講，「其實，我只是負責吹雞，整件事情發展都是依靠香港的巴打大家一起參與的。這次籌款，也代表了網上關心政治的網友比以前多了，加上以前籌錢的經驗，運作也變熟了，大家都知道有甚麼要做，和怎麼樣做。」
唔少網民都發揮創意
佢哋諗住喺6月22日即立法會表決政改方案前一天，喺報紙登全版廣告。至於廣告嘅概念，暫定係一個貼住「起錨」標籤嘅罐頭，食用日期係05年12月21日，即係立法會上次否決政改方案嘅日子，仲大字標題「明知過期都要？」不過，唔少網民都發揮佢哋嘅創意，度咗唔少建議，八方揀咗部份登喺度畀大家欣賞吓。
mailto:[email protected]
