自從「維園阿哥」踩入《城市論壇》後，每個星期論壇都逼爆。噚日論壇主菜係討論內地工潮，雖然唔係講香港政改，但班維園哥仔亦一早霸定頭位，好多人仲帶埋標語嚟，包括將煲呔嘅起錨口號，改成「超錯」、「撤回」，每逢廣告時段就舉牌，唔放過任何機會。近排成日出招嘅事旦男亦帶咗張「起碼，功能早別」紙牌到場。但最搶鏡嘅係，針對最近左派團體派錢、搞荔枝團、海鮮餐利誘市民參加撐政改遊行，有人舉起「撐政改遊船河，報名請電266366，每位可得500元」嘅紙牌，咦……個電話咁熟嘅？咪係廉署好耐以前嗰個舉報熱線囉。