焦點在世界盃，墨西哥灣的漏油事故靜了下來，可是並不等於已解決，英國石油公司（BritishPetroleum）還在努力搶修中。而為了減低這場生態災難對公關形象的破壞性，公司喺Google及雅虎等網絡搜尋器供應商大賣廣告，每當網民搜尋油污等字眼，都會自動有連結彈出，話你知BP正努力搶修，希望挽回公眾形象。
呢個公關手法查實幾幼稚，一向惡搞的綠色和平趁機發起將BP的Logo重新設計嘅活動，到家已收集到超過300份作品，不少人都將BP原先綠色的「環保」概念Logo變身為一大滴黑色的油污，有啲甚至將BP改名為BritishPolluters。
呢種公關手法才是最高明，一方面可以用極低成本引起公眾關注，從而成為話題之作，另一方面透過鼓勵互動參與，提高發佈訊息的效率。有公關朋友訴苦水，近日世界盃個個Event都以足球做主題，要動員記者採訪難上加難。公關大哥大姐們不妨動動腦筋，並非凡宣傳都要銀彈至上。
搞宣傳並非銀彈至上
話說回來，呢次美國史上歷來最嚴重的漏油事故，專家們指再拖下去將成為史上最大的環境災難。每日究竟有幾多油漏入大海，如同六四燭光晚會參加人數，各方都有不同估算。油公司話每日只漏緊5000桶，即係21萬加侖，獨立調查機構話應該係1.2萬至1.9萬桶，而政府則話係3萬桶，相當於130萬加侖。
紙包唔住火，水更包不住油，油公司隱瞞事實，公眾形象受損，賣幾多廣告都補唔番。漏油兼逢打大風，碰啱進入颶風季節，天文台估嚟緊最少有7場強烈颶風，油污肯定進一步擴散。
英國石油到目前為漏油事件已動用14億美元，還未計來自漁民、甚至沿岸地區居民的索償，雖然油公司抽番起漏油仍然可以攞去賣錢，有大行仍預計呢次災難英國石油最少要使370億美元清理油污，亦即係公司過去3年所賺嘅總和，令市場擔心會否有破產危機。
若連BP都要破產，勢必引來另一輪投資市場動盪。好彩BP唔係當年的雷曼兄弟，公司過去5年每年的淨現金流超過240億美元，淨資產超過1000億美元，唔似當年雷曼負債較資產超出23倍咁誇張，肯定唔會一夜之間人間蒸發。
胡孟青