你問我男人揸咩車最有型，浮誇招搖嘅超跑怎也不及有型有勢嘅SUV四驅來得有味道，睇見一眾型男明星如Chilam、伊健等都係四驅擁躉，你就知SUV對男人嚟講有幾大號召力。有本錢揀品牌的話，夠靜又豪華嘅Benz向來都係頭號目標，但以往最低門檻都要索價65萬，突然有較細容積引擎嘅ML300Facelift出現，一眾朝SUV大軍方向進發嘅型男們，你哋可以儲少10萬蚊喇。
記者：許維雅
攝影：伍慶泉
Model：Eriko
香港地有時想搵條爛路影吓相都難，要攀山涉水反而難過登天，即使四驅車顯得大材小用，卻無損一眾型男對四驅SUV嘅鍾情，主因不離「有型夠霸氣」。何謂有霸氣？因為落雨而改入廠影相，指揮部平治ML300駛入閘嘅一刻，未到一半我已經忍唔住叫停，充滿剛陽味嘅車頭，唔使揸得快亦一樣有懾人嘅氣勢，即刻叫攝影師捕捉住呢個入半閘嘅場鏡。
呢啲當然要歸功於夠晒搶眼嘅三層多格式鬼面罩、神氣非常嘅特大Bi-Xenon白光車頭燈，感覺硬朗嘅車身線條喺1,815mm高嘅車身襯托底下，就好似有個高大猛男喺你身邊。雖然話呢部ML300係入門版，但外形上唔會因為咁而好寒酸，其實跟ML350及ML500無乜分別，原裝更跟上唔少SportPackage配件、一對19吋合金輪圈嘅Facelift版，為佢增添不少活力。
雨中飛馳更顯穩固
話雖四驅車在港發揮機會不大，遇着影相當日天雨路滑，四平八穩嘅4Matic四輪驅動就可表現出紮實穩健嘅一面。感覺尤其暢順嘅7G-TRONIC自動波箱，即使上斜落斜都令人得心應手。比起ML350，引擎雖然由3.5公升縮為3公升，馬力輕減41匹至231匹，起步反應卻同樣敏捷，爆發力已經夠用有餘。好多人以為四驅車一定好大食，但據廠方提供嘅綜合油耗只係9.3L/100km，以油價約$14計算，都係約$1.3一公里。為慳錢又好，為環保又好，買車又何須下下揀大偈。內櫳亦係同等豪華嘅真皮襯電鍍設計，內外幾乎都同其他M系分別不大，不過就可以大拿拿慳番十萬蚊老婆本，揀66萬嘅ML350定係56萬嘅ML300，無論你係婆仔定型男，你都識得揀邊架抵啦。
平治ML300規格：
引擎：2,996ccV6
馬力：231hp/6,000rpm
扭力：300Nm/2,500-5,000rpm
傳動：7G-TRONIC自動波箱
售價：$558,000
查詢：28957339（仁孚行）