除咗高登友籌款登廣告，全職網民「阿羊」為咗監察班議員點投票，亦搞咗個「6.23政改表決日誰是轉軚泛民大賭局」嘅網站（ http://3k2q.com/demomoni/）。
每個facebook賬號會有23粒花生，網民即日起可將花生落注喺覺得最有可能轉軚嘅議員度，所有賭注純粹用作計算賠率，賠率即轉軚指數，6月18日佢哋會向轉軚指數最高嘅議員，頒發獎狀。
阿羊話，希望透過呢個「全民公決」向泛民議員施壓。到噚晚為止，馮檢基轉軚指數仍然排第一，共獲6,721注，賠率係1賠1.57，屬頂頭大熱；排第二同第三嘅就分別係李國麟同湯家驊。人在做，網民在看，泛民議員真係要醒定啲。