農夫開騷雖然遇正端午節加世界盃，但前日他們綵排時宣佈全場已爆滿。楊千嬅和任賢齊屆時未能捧場，前日二人前來探班，農夫卻送上寫了「過到今年」的蛋糕為小齊預祝生日，認真黑心。
後日端午節，又是農夫第一次在紅館開騷的大日子，同屈原加世界盃鬥過，門票售罄，農夫總算有交代，不過他們要多謝圈中好友支持，王菀之買了20張飛，謝安琪買了30張，任賢齊又包起50張。
前晚小齊專程到九龍灣探班，將於23日生日的他到錄音室第一時間收到農夫送上生日蛋糕，本來應該好開心，但農夫竟在蛋糕寫上「過到今年」，農夫又大笑說：「大吉大利，百無禁忌……屬豬屬羊迴避……」小齊隨即反擊說：「嗰日我要去北京宣傳，好耐之前度咗（期），所以去唔到（農夫個騷），我要咗50張飛，到時嗰啲吉位就係我嘅。」
千嬅被寸走音
千嬅當日一樣要錄音不可以去紅館支持農夫，她為了表示誠意送了一個祝農夫演出成功的蛋糕給他們，怎料農夫卻回敬千嬅一支紹興酒，然後說：「有酒飲，無走音。」一語中的，千嬅當場語塞，來不及反應。
千嬅表示跟農夫的相處是互相傷害大家，故不會介意，她說：「由相處到相識都係互相傷害大家，慣咗，就算佢哋喺台上唱我都冇所謂。」
農夫表示開騷前有少少驚，而且鐵定會準備一個環節給老闆陳冠希，陸永說：「唔一定係唱歌，總之有一part佢會出現，佢會上台。」
採訪、攝影：楊潔雯