捲入多角戀關Baby事
馮仁昭四圍超：阿嬌撇William　曉明憔悴 - 馮仁昭

當Angelababy（楊穎）戀上黃曉明後，好多人話Baby一腳踏兩船，話佢背男友陳偉霆（William）暗撻曉明。不過噚日就有人爆料話陳偉霆同Baby一齊時，其實都頗為花弗，先後過鍾欣桐（阿嬌）、鄭融同G.E.M，仲話佢對蔡卓妍（Sa）都好嗒糖。

WilliamTwins

有知情人士講，上年Baby成日出埠做嘢，有傳William拍《前度》時狂用SMS攻勢冧阿嬌，但兩個人喺埋一齊唔夠一個月就冇咗下文，因為阿嬌知道佢同Baby仲有喺埋一齊，唔想做第三者。其後William轉冧阿Sa，仲出動午夜追魂call，據聞當時搞到鄭中基都唔係咁高興，而冇耐Baby同William亦散埋，幾角關係糾纏不清。
William嘅舊愛阿嬌同情敵黃曉明，噚日不約而同喺上海宣傳電影。飛起William嘅阿嬌就孖住前緋聞男友方力申同劉鎮偉宣傳《出水芙蓉》，兩人見面都冇乜尷尬，阿嬌仲話：「一落機飲咗兩杯咖啡就中招，屙到七彩。」提到拍檔阿Sa外公過身，阿嬌話落機先知道，已經發短訊問候。
至於Baby男友黃曉明噚日同張靜初去咗上海交通大學同大學生交流，順便宣傳新戲《唐伯虎點秋香2》，見佢個樣都幾憔悴，又留晒鬚根，唔知係咪因為又要拍拖，又要做嘢，搞到個人落晒形。