失手無罪，但低級失手就罪加一等！尤其英國那邊，本來諗住世盃英、美大戰當天雙喜臨門，難得英國F1車手咸姆頓生性，喺加拿大站排位賽排第1出賽；當「黑帝」同一眾英國粉絲力撐英格蘭勝美國時，點知着住綠衫嘅羅拔格連（RobertGreen），可能姓氏同波衫顏色「相剋」，接波甩手漏入網，累英軍和波，認真大殺風景。
保特「包拗頸」捧阿根廷
其實，唔單止英國人好似咸姆頓或畢頓先至留意今屆世盃，唔少運動健將都難逃世盃魔掌，各有力撐理由，但最「包拗頸」嘅，首選牙買加「飛人」、百米世績保持者保特，講到世界盃，佢話：「我細細個時，個個人都捧巴西，我偏偏唔鍾意跟風，所以我支持阿根廷，以前嘅戰神巴迪斯圖達到家嘅新球王美斯，我都鍾意。」至於「叛國」球迷，則首推湖人球星拜恩，佢有美國唔捧，「變節」捧巴西同意大利入決賽。
講開「叛國」嘅美國運動員，打入英國皇后會盃決賽嘅網球手費殊，賽後即場被問到預測英、美大戰比分時，他先係對「WorldCup」呢個名詞有啲生疏，仲貼美國入兩球、英格蘭入7球㖭（最終和1:1），想討好英國球迷都唔使估得咁離譜啩！女子叛國版，就有前400米跑世績保持者古華娜，佢一啲都唔睇好祖國墨西哥，仲話：「墨西哥欠缺野心，如果可以殺入8強，已經好盡喇！」
「費達拿」周三鬥「拿度」
好在網球壇仲有班「愛國」fans，瑞士嘅費達拿同西班牙嘅拿度，由網球場鬥到足球場；咁啱得咁蹺，兩國剛好同處H組，禮拜三（16日）晚就會喺分組賽對壘。拿度就話希望將自己啱啱攞到法網冠軍嘅運氣，帶畀西班牙；但「費天王」亦唔弱，佢比「泥地王」多一條出路，事關佢係瑞士、南非混血兒，就算其中一隊輸咗，都仲可以捧另一隊。