評馬Ｙ係標準球迷，每逢四年一次世界盃，佢必定廢寢忘餐咁睇波，有時甚至在波樓打完枱波之後，留在波樓睇波睇到過夜。今年又如何呢？哎吔，得有線電視直播，佢又搬咗入上水，住在村屋，距離市區甚遠，去波樓與報館睇波，唔算方便，於是立即申請安裝有線，有線派人到場一睇，話要在村屋天台裝一隻鑊，須得業主同意，業主話冇所謂，只要你以後肯負起一切因工程而引起之漏水損傷責任就得嘞。嘩，天台漏水，可大可小，評馬Ｙ孭唔起，於是唔制。在家冇波睇，去邊度好？評馬Ｙ人住上水，實際係早出晚歸，對上水完全唔熟，佢想有心人士指教，在上水市區有何睇波好地方喎！
評馬Ｙ係終身阿根廷擁躉，問佢邊一隊會攞冠軍，佢永遠貼阿根廷，今屆當然不變。左丁山就估係巴西與西班牙爭冠軍，西班牙勝，決賽連贏位買巴西、西班牙，係一面倒大熱門。BBC搵五十八位專家畀貼士，二十三人貼巴西，二十四人貼西班牙，五人貼阿根廷，四人貼英格蘭，一人貼烏拉圭，一人（尼日利亞副教練）貼尼日利亞，可見巴、西對決，熱到爆棚，邊隊會贏，如果用跑馬術語，直情係deadheat（平頭），分分鐘要射十二碼分勝負。
貼阿根廷贏世界盃，其實幾正路，擁有美斯嘅球隊，點都有機會嘅。但點解有四人認為英格蘭有機會呢？呢四位係前瑞典右閘奧臣，瑞士球評家史得，巴西前國腳蘇古迪斯，前英格蘭中場湯瑪士；巴西過氣球星居然認為英格蘭第一，西班牙第二，巴西第三，荷蘭第四，即係等於話巴西在四強準決賽會輸畀英格蘭，英隊憑乜本事呀，就係靠一個朗尼？左丁山唔多信，但係巴西球星對自己國家隊應該最熟悉，想來必有道理。英格蘭上次奪標係1966年，大英雄靴斯（SirGeoffHurst）就認為巴西第一，西班牙第二，荷蘭第三，英格蘭第四。兩人嘅四強陣容相同，但名次調轉，以左丁山愚見，SirGeoff嘅意見啱聽啲。