要不是世盃迫在眉睫，接踵而來連續3季的英超都被有線奪得獨家播映權，我知道無論如何都要再度成為有線用戶，才可安心收睇賽事，但你不會知道我有幾咁心不甘、情不願。
我與有線的關係始於96年，她首次直播歐國盃賽事，直至3年前，你一定以為因為英超移師到now，為了區區幾百元月費，我要與有線分手？錯！當初無疑是因為足球賽事才開台，但其24小時新聞台卻令我留低，最後是其惡劣的服務態度，令我一氣之下成為「滅絕師太」，務必要同有線恩斷義絕。
「你丈夫鍾意睇波呀」
可能心裏抗拒，一直拖延到從溫哥華度假回港，才急忙跑去要求重新安裝，那是6月4日的下午；站在成和道口，我與當日易拉架負責人珠女的對話如下：「我要睇世盃同英超，個Plan幾錢，幾時可以安裝？」或許珠女未見過如此爽快的用戶，故不慌不忙的招架：「我畀盡特別優惠你，簽兩年約，一個月300幾，如果唔嫌夜，最快今晚可以安裝。」
我爽你豪，身份證、信用卡即時出動，珠女邊對邊碌邊同我講：「小姐，先生鍾意睇波呀？」冷不防被她這句話問到口啞啞，小姐，先生？我當然是小姐，但何以又先生呢？比平日的反應慢了10倍，才明白她其實想講：「小姐，你丈夫鍾意睇波呀？」惟有回答：「我本人都鍾意睇波。」
珠女其實無意冒犯我，但我被她那一句話刺痛了，不是因為她令我覺得自己似老姑婆，只是2010年，仍然有人認為足球是男性的世界、男性的專利、男性的嗜好，真係好失敗！
作為一個自供自給的事業女性，很多時跟新相識的男性講及自己鍾意睇波，從他們的眼神就知道，他們把我歸入那種因為萬人迷碧咸靚仔，才開始睇波的典型女球迷。因此，惟有公開我的秘密，我第一個迷上的球星是奇雲基瑾，時為1974年，他踢利物浦的年代！
文：盧覓雪
港台主持
電郵：mailto:[email protected]