世界盃開鑼，老友鐳射影音創辦人譚學昌同小妹講，近日高清薄屏電視機銷情暢旺，比平日賣多咗三、四成，日韓牌子最好賣。小妹走去啲電器舖巡一巡，唔少電視機都趁世界盃減價促銷，各牌子吹噓自家產品質素最掂，播放快速移動嘅畫面冇殘影，睇波一流。
Sony同LG各三款上榜
部部機都話掂，點揀好？好在小妹都幾有國際視野，每月都訂閱英國消費者協會《Which？》雜誌。今期佢哋打正旗號就世界盃嚴選「最佳睇波電視機」，結果六部評分最高的電視機上榜，日本Sony同韓國LG各有三款，平分春色成為大贏家。
雜誌話，今次測試咗12部電視機，比較佢哋嘅高清同標清畫質、聲音質素、使用方便程度等項目，特別測試快速移動畫面嘅質素，SonyKDL-V5810以74分（滿分100）排名榜首，高清畫質不俗，動作畫面流暢，聲音質素具水準；排名第三及五都係Sony，型號分別係KDL-Z5800同KDL-W5810。
韓國LG成績都唔錯，三部電視機上榜，排名第二嘅LGSL90僅以一分之差屈居亞軍。雜誌指，SL90機身超薄，採取LED背光技術，顏色自然，畫面細緻，操作容易。SL80同LH40分別排名第四、第六。
Sony公關Fiona話，香港Sony最近推出咗全新嘅NX、EX系列電視機取代V、Z、W系列，而新鮮熱辣嘅係3DTVHX900同LX900啦。LG電子巿場總監David話，SL90以無框邊設計型格十足，連女客都好冧o架。
電郵：mailto:[email protected]