踏入夏天，係時候出外唞唞氣。如果對西貢食糖水、深井食燒鵝玩到悶，咁揸架直路快放、彎路靈活嘅TTS同女伴入新界兜番個圈、摘下士多啤梨、探索紅樹林、到魚塘釣埋魚，新鮮感大得多。平日去仲要全程免費泊車，感覺更抵。
記者：趙慧敏
攝影：陳盛臣
Model：Alia、Sam@PureModels
第一站 摘有機草莓
路線：沙頭角公路→坪輋路→雲泉仙館旁
泊車：雲泉仙館前空地
既然入新界，不妨由粉嶺開始，第一站向士多啤梨園進發。由市區出發，沿吐露港公路一直向粉嶺公路走，見沙頭角的岔叉口轉入，經沙頭角路，見坪輋路牌轉入行約五分鐘就到。由於士多啤梨園隔籬正是雲泉仙館，行駛時留意雲泉仙館路牌即可抵達。
本港士多啤梨的收成期是每年10月至5月，夏天已是季尾，近日不少士多啤梨園已一一「收爐」，不過這個士多啤梨園由於去年底始經營，土地較肥沃，所以現時仍可繼續收成。雖然未至於出現整個場紅噹噹嘅壯觀場面，但細細粒嘅士多啤梨總算幾甜，加上親手摘落嚟，總會加啲分。
貼士
據園主講，由於近日多雨水，士多啤梨產量會較少，加上周日不少人到此採摘，所以士多啤梨隨時俾人摘清光，再有新收成可能要等一兩個禮拜，所以事前最好打個電話問一問。
查詢：阿方有機士多啤梨自摘園（62377087）
收費：入場免費，士多啤梨$45/磅
第二站 紅樹林觀景
路線：沙頭角公路→鹿頸路
泊車：天后廟旁空地或附近公眾停車場
摘完士多啤梨，返回沙頭角路，再向沙頭角方向駛，行車約七分鐘，留意右邊鹿頸路牌駛入。進入鹿頸，沿路便屬紅樹林範圍，呢處除有紅樹林景色外，仲有唔少蟹仔、魚仔喺度活動。唔鍾意睇紅樹林，呢處都有唔少小白鷺，觀鳥一流。
貼士
鹿頸路大部份路段屬單線雙程行車，有不少對頭車迎面而來，加上彎位多，開車千祈唔好咁快。
第三站 釣魚擦番餐
路線：鹿頸路→新娘潭路→汀角路→大尾篤路
泊車：平日免費（假日$50全日）；或到大尾篤公眾停車場
玩完兩個景點已經攰攰哋，不妨坐低釣吓魚。離開鹿頸，向大埔方向駛，沿新娘潭路、汀角路駛，到大尾篤巴士總站前路口，左轉入大尾篤路便見「大美督魚場」。呢個淡水魚場年終無休，有鯇魚、福壽魚、鯉魚、桂花魚等廿幾個品種。
玩咗成日，個肚開始咕咕聲，魚場提供即釣即燒服務外，還有其他燒烤食品。至於燒魚，梗係以福壽魚為首選，燒時可將加入蒜茸及薑茸的魚用錫紙包好，放爐邊焗15分鐘；唔鍾意蒜茸味，可以選擇鹽燒，先放薑入魚肚，再用鹽塗抹魚身，以鐵夾魚喺明火烤熟就得，脆卜卜夠好味。
查詢：大美督魚場（26626351）
釣魚：平日$25/每小時（會員）、$45（非會員）；
星期六日及公眾假期$30/1小時（會員）、$50（非會員）
5小時釣魚燒烤套餐（10人起）：每人$148（平日）、$168（假日）
火紅辣妹TTS
今次揸住架AudiTTS，行勻半個新界，既有高速公路，又有蜿蜒小徑，發現車仔辣味十足，最緊要係想快想慢隨我控制，最啱我哋呢個又要刺激，又要安全感的矛盾性格。而且架車又夠型，去到邊度都吸引途人目光。
AudiTTSCoupe2.0TFSIQuattro
售價：$618,000
查詢：合迪汽車（25281862）
