商台DJ、艾粒成員Donald自從購入PanasonicGF1以及成為iPhone用家後，經常拍下身邊的人和物，他認為iPhone的出現，令人更留意身邊的事物，而隨街影亦成為潮流，其iPhone中有超過七成的App都是與攝影有關。喜歡攝影的Donald希望繼去年的BlackFace攝影展後，盡快舉行一個名為HappyFace的影展。撰文：李珮洳
懶貓物語
「屋企嘅貓Michael，佢成日匿埋喺窗台條罅度瞓覺，見到佢懶洋洋咁嘆，我發覺做貓都唔錯。」
癲Phone之作
換面雙雄
「呢張相係用iPhone嘅iSwapFaces影嘅，難得見到Eason喺度，佢又肯俾我影，不過阿占同Eason換完樣之後，有啲似陶大宇。」
接駁專家
「呢張都係用iPhone影嘅，張銀紙上嘅人物就係傳說中嘅郭藹明，到我睇番張相時，我發覺自己個樣好普通，襯乜嘢樣都得。」
Milk皇肖像
「佢叫阿Milk，係我屋企嘅皇上皇，呢張相係我買GF1第一張試機相，不經意影嘅嘢效果反而仲好。」
速遊鐵塔
「去日本好多次都冇去東京鐵塔，今次喺巴士上見到，第一時間拎相機出嚟影，睇真啲上邊好多天線。」
坐看風雲
「搬咗嚟呢間屋，最鍾意就係望天睇吓有冇UFO，有一日見個天好多雲，覺得嗰嚿雲好似軍艦。」
人有相似
「於日本街頭巧遇一名美少女，佢個樣同香港女子組合Krusty成員阿Jan十分相似。」
暴走童心
「喺新加坡環球影城隔籬嘅噴水池影，有個小朋友喺度跑，小朋友唔怕鏡頭，仲畀佢最真嘅一面你影。」
路邊野花
「去打鼓嶺打wargame，落咗車行咗個山先到，沿途發現啲花好靚，好似外國先至會見到。」
閃電傳真
「前排成日落雨，喺屋企哺住幾時閃電，等咗15分鐘終於影到，冇手震仲要影到條閃電，滿意之作。」
黑口黑面
「BlackFace影展其中一張作品，當時叫成日俾人話黑面嘅林海峰扮嘢畀我影番張。」
