要數特區政府當今最佳部門，非食物環境衞生署莫屬。先有月初曲線宣傳六四集會，再有近日推出網上墓園，完全滿足晒香港人慎終追遠，毋忘先人嘅心願。食環署「無盡思念」網站開咗不過兩日，已經有好多人善用公共資源，先後為馬力、林彬、哥哥、阿叔、魔警開設網上靈位，政府網站好耐冇試過咁受歡迎。
暫時最熱鬧嘅靈位，屬於03年跳樓身亡嘅一代巨星張國榮。兩日之內，已經有幾十人登入哥哥嘅網頁留言追思。網頁整得好有心機，哥哥生平、相片、影片都有得睇。八方唔知邊個咁有心幫哥哥開網頁，根據食環署嘅條款，只要死者係食環署火化或安葬服務嘅使用者，任何人都可以為佢建立紀念網頁。
借馬力弔六四
世界盃噚晚開鑼，有人好應景咁幫香港球壇名宿林尚義開設追思網頁，不過首頁嘅車頭相竟然用咗巴士阿叔嘅圖像，真係吹脹。好多人都好懷念阿叔講波，有網民就留言話：「永遠懷念，今年世界盃沒有你，真的失色不少。」網頁附載咗一段短片，係06年世界盃期間，阿叔扮巴士阿叔幫無綫拍嘅廣告。
「無盡思念」網站裏面仲有幾個熟識嘅名字，包括已故立法會議員兼人大代表馬力、67暴動期間被左派燒死嘅商台名嘴林彬，仲有涉及三宗開槍殺人案嘅魔警徐步高。馬力嘅網頁，列出嘅逝者姓名係「全體六四死難者」，英文姓名「TiananmenMassacre」，別名「六四屠城」，網頁上載咗多張六四相關圖片。
劇團借勢宣傳
不過，食環署前晚以不適當使用網站為由，刪咗馬力嘅網頁；發言人話，先人網頁嘅資料，必須同先人相符。不過噚日好快又有網民再開另一個馬力嘅網頁，仲有個叫「轆豬」嘅網民留言，明顯係諷刺馬力生前以「坦克轆豬」測試六四屠城嘅謬論。另外又有人開設咗一個「紀念六四死難者為民建聯服務」嘅網頁，可圈可點。
追思網站網址係 http://www.memorial.gov.hk，前日開幕，兩日內已有大約1 ,600個用戶成功登記，點擊率約5.7萬，收到6宗舉報。食環署聲稱有專人管理網站，不過有話劇團體借用追思網站宣傳，被刪咗又再開，睇嚟呢個網站無盡思念之餘，仲有無盡創意、無盡商機。
mailto:[email protected]
