港台噚日為第三屆香港書獎頒獎，唔少文壇重量級人馬嘅作品獲獎，包括至今已賣到第九版、龍應台嘅《大江大海一九四九》，以及陳冠中喺北京同退休高官飯局取得靈感寫成嘅《盛世中國，2013年》。賈樟柯嘅《中國工人訪談錄》、西西嘅《縫熊志》、小思嘅《辛苦種成花錦繡—品味唐滌生《帝女花》》亦獲獎，可惜呢班名筆唔係唔喺香港，就係忙於創作，噚日冇親身領獎。
華叔任頒獎嘉賓
但頒獎禮仍然好熱鬧，嘉賓包括頒獎畀《六四二○》作者陳潤芝嘅支聯會主席華叔。陳潤芝話，當初喺香港搵人出呢本有關六四嘅書都幾困難，一度諗過只出1,000本，點知本書喺六四20周年晚會推出後，即時賣斷市，及後加印至5,000本亦好快賣晒，難怪陳潤芝喺台上都要讚句：「香港人真係好勁！」
陳潤芝仲好有心，按教協提供的學校名單，將本書寄去全港大學同中學，希望下一代喺學校圖書館可以了解到呢段咁重要嘅中國歷史。