肥仔K有位表弟C在一月時往澳洲讀書，讀一啲大學先修班，希望一年後可以考入大學，臨行前，曾搵肥仔K教路，因為佢知道表哥在美英日闖蕩九年，有啲留學心得。肥仔K對佢講：「第一條就係慳錢，唔好跟啲有錢同學去唐人街食大餐或去酒店食西餐，第二條就係疏離香港同學，認識多啲外國人，爭取多啲機會講英文，學好英語會話，如果唔係，四年後返嚟香港，講英文仍然似普通中學生。」
眨吓眼已經五個月，表弟C最近透過Facebook向媽咪匯報：俾香港同學排擠、篤背脊，媽咪大驚，問吓因由。表弟C話：「我聽表哥K話，盡量認識班上外國人，有巴基斯坦、印度、馬來西亞、非洲等同學。佢哋個個講英文好過我，又主動認識幾個中國大陸女同學，同佢哋講普通話。但有五六個香港男同學唔抵得，話我媾女仔、媚外，背後又彈我英文差，普通話講得核突。佢哋放假就話去唐人街食飯，我唔肯去，俾佢哋笑我恨做外國人呀！」佢媽咪唯有向肥仔K詢問：「怕唔怕o架，阿仔好似好孤獨，唔開心喎？」肥仔K答：「怕乜吖，睇嚟表弟抵得住啲香港同學篤背脊，夠堅強吖。香港朋友喎，返嚟香港可以搵到大把，在外國最緊要識多啲五大洲朋友，學番啲國際視野。」
如陶傑講過，不少香港學生在外只識花費富爸爸、富媽媽嘅錢，在唐人街大魚大肉，呢類學生識唔識都罷，睬佢地都儍。表弟C嘅媽咪係一間大學嘅職員，送兒子出外讀書，當然冇錢畀兒子在外開party！問佢本地大學生又如何呢？呢位媽咪話：「我做咗大學職員二十幾年，越睇越心淡，家啲大學生有時幾離譜。我系教授開一科在早上八時半上堂，就俾學生大罵，教授嫌太多學生遲到，成日要佢開門，影響教學，於是將課室前門閂咗，遲到學生要行樓梯從後門進入，又俾學生留言鬧到死，你話啲大學生有無道理吖。如果一啲教授嘅notes（講義）唔係彩色打印得好靚，學生又鬧啫，一啲年青教授好驚學生o架，要買佢哋怕，畀分比較鬆手，二十年來，以我所見，荒唐大學生越來越多，好彩仲係見到有好醒嘅叻仔叻女！」