世界盃都開鑼囉，早排戲院話會直播3D世界盃賽，都未有聲氣。其中有意播3D世界盃嘅洲立影藝話，暫時播唔到波唔緊要，佢哋會將戲院搖身變做歌劇院，全港首播高清歌劇。佢哋仲邀請咗小妹去咗康怡戲院率先試睇其中一套高清歌劇《卡門》，成間戲院200幾個位，淨係播畀小妹睇，無遮無擋感覺都幾舒服。
洲立影藝總經理黃寶珠話，今次戲院會播四齣高清歌劇，除咗《卡門》外，仲有《杜蘭朵》、《阿依達》、《霍夫曼的故事》，分別喺呢個月19日、20日、25日、26日同27日，合共播五場，全部嚟自紐約大都會歌劇院。佢話，戲院播歌劇家喺歐美好興，好似紐約大都會歌劇院06年起將高清拍攝歌劇演出，傳送到美國、英國、日本等地播放，家發展到42個國家播映。喺戲院睇同劇院睇絕對有唔同感受。
真係連腳毛都睇到
小妹之前喺倫敦劇院睇過歌劇，場面好Grand，個個都着晒晚禮服，好似去Ball咁，好有氣氛。但想坐好位啲門票要成以千元計，小妹買平飛，距離舞台好遠，主角啲表情其實睇唔清楚。今次喺戲院睇《卡門》，佢哋用咗12個攝影機拍攝，廣角鏡、大特寫等乜嘢角度都有，好似一幕女主角烏低身洗腳唱歌場面，真係連腳毛都睇到。畫面又有英文字幕，都知道佢哋唱乜。最特別連換場景、樂隊演練嘅情況都有得睇。
黃寶珠話，每套歌劇播放3、4小時不等，成人票價150元，長者及學生票價100元，都幾超值o架。
查詢電話24188841。
電郵：mailto:[email protected]