now新聞台嘅《大鳴大放》噚晚播出社署前署長余志穩專訪，余志穩5.16有投票，但佢秉承文官傳統，噚晚冇正面批評煲呔為首嘅一班官員冇盡公民責任係咪唔啱，但佢話一定會鼓勵人去投票。
做官要講官話，做人就要講真話，余志穩承認，做公務員有時感覺人格分裂，即使對某個議題嘅睇法好強烈，但為保持政治中立，唔應該作任何評論影響政策。不過，咁唔代表做官一定要唯唯諾諾。
好似當年佢加入社署時，社署啱啱拍咗兩條片，一條講呃綜援，一條講綜援人士唔想做嘢，但佢堅信大部份香港人係誠實，每千宗綜援個案亦只有兩、三宗係呃綜援，佢亦唔信「綜援養懶人」，所以當年佢聽完一啲團體反映意見後，即時抽起兩條片。