睇波選擇多，開房睇波又如何？二人世界夠溫馨，三五知己嗌到坼天夠氣氛。全城酒店推出有得飲有得食世盃住宿套餐，睇到攰瞌番陣鬆鬆骨再睇波，爽！
記者：梁美甜
攝影：伍慶泉
Models：Kinki&[email protected]
呷花茶嘆專業按摩
要數最突出世界盃酒店住宿套餐，一定有「帝京酒店」份兒，包免費肩頸按摩，可算奇招！賽事期間，酒店推出$1,130高級客房及$2,130豪華套房優惠，各包一晚住宿、六罐啤酒、薯片、杯麪及即叫即製雜錦小食拼盤，最搞鬼當然是捱完眼瞓後，有專業按摩師提供肩頸按摩幫閣下鬆鬆骨，可選擇兩位各按30分鐘或一位按足60分鐘，鬆骨地方有電視及花茶供應，金睛火眼一分鐘賽事也不會錯過，意志力薄一點，按兩按呷一口花茶，隨時輕輕鬆鬆會周公。
不想過夜，可夥同友人到置有三個特大螢幕的酒店酒吧「彩雲軒」，餐飲套餐每位$98，包小食及標準飲品（紅白餐酒、啤酒、汽水任擇），入場更可玩遊戲，每晚送出兩份獎品予猜中勝出隊伍或波膽的客人，更有機會贏取終極大獎，拿走刻上自己名字的24K鍍金杯及24K鍍金足球返屋企，一條紅衫魚有得食有得看世界盃，好抵！
彩雲軒（26226154）
帝京酒店（26226110）
迷你酒吧清倉
「帝苑酒店」推出世界盃客房套餐，$1,288包一晚高級客房住宿、酒店酒吧「Martini」兩杯標準飲品及免費會所設施等等，最正是套餐收費已包$600餐飲券，可任選在酒店內六間餐廳及酒吧、客房內的迷你酒吧消費，打開客房內的迷你雪櫃，少說也有五六瓶迷你烈酒及多罐啤酒汽水，不用出房門也可以豪隊睇波。不買套餐，Walk-in到酒吧「Martini」看賽事也行，世界盃期間最低消費每位$180，叫一客小食及一杯飲品剛好！
Martini酒吧（27332995）
帝苑酒店（27332828）
房間特大唔使逼
住Penthouse睇波！「城景國際」推出的世界盃住宿優惠，房間特大，每晚$1,980，除包六人份量狂熱美食套餐、Pizza小食花生果盤汽水啤酒，更可享三五折額外另一晚住宿淨房價優惠、七折享用「CityCafe」自助餐，六人均除不過三百零蚊，諗得過。
城景國際（27833231）
贈送明信片
「麗悅酒店」素來玩時尚摩登風格，房間色彩多變，推出24小時全天候世界盃主題客房住宿計劃，客房及樓層有特定世界盃主題，住宿時間以24小時計，早餐可於24小時內送遞上房，即日至7月10日每晚每房$990，可自選顏色高級客房、享用五種國家啤酒及贈送世盃限量明信片紀念品。
麗悅酒店（35528388）
Hip爆睇波空間
「帝樂文娜公館」素來走高格調豪華品味，賽事期間推出的住宿優惠$1,088起，包一晚Superior房間住宿、於裝飾Hip到暈的「Aspasia」享用美式早餐、免費享用房內迷你酒吧、即叫即製Aspasia招牌意大利薄餅或公司三文治等等。房間是眾多酒店中最靚之一，不用出房門口也可睇波夠玩一晚了。
帝樂文娜公館（37638880）
加$50多個套餐
「富豪九龍酒店」推出兩款世界盃Fever住宿計劃，房價分別是$938及$988，各包一晚標準房和啤酒薄餅小食，$988套餐另包兩位飲品套餐及迷你小食拼盤等。
富豪九龍酒店（23138638）
飽肚消夜
「麗豪酒店」推出的情迷世界盃住宿計劃超平，每房每晚$798，包高級雙人客房一晚、月光光消夜套餐兩位、房內啤酒六瓶。消夜套餐份量強，加幾杯啤酒，要狂跳狂叫一晚至消耗得了所有卡路里呢！
麗豪酒店（21321213）