周國賢（Endy）已有四年沒有推出個人唱片，幾年前他與好友組成樂隊Zarahn，成績不俗。正當Endy想全心全意發展樂隊之際，卻因為現實問題，令他只好放棄組band理想，重拾個人歌手身份再戰樂壇。轉投新公司，Endy的理念是：「今次係最後一次機會，點都要瞓身博到盡。」
周國賢早年以個人身份在樂壇發展，有不錯成績，之後他與幾名好友組成Zarahn，作品也大受歡迎。原本一心繼續夾band的Endy，早前見到bandsound氣勢大勇，懷着熱誠準備與隊友再闖一番事業，可惜大家都敵不過現實生活。
打理生意非所願
Endy日前接受訪問說：「有兩個成員唔想全職夾band，我好明白大家都要生活，自己都有三個女，最後大家傾好就係日後業餘咁夾band，Zarahn唔會解散，但唔知幾時先會再出碟。」
放棄了理想，Endy得到現在的唱片公司高層給予機會，再次以個人歌手身份，於下月推出新碟。事隔4年，需鼓起更大勇氣去重新面對歌迷，他說：「今次係最後一次機會，點都要瞓身博到盡。」
Endy強調沒有後悔過夾band，早前曾放棄歌唱事業而幫爸爸打理海味生意的他，曾一度覺得鬱鬱不得志，他說：「嗰時日日返工都唔知自己喺度做乜，本來老婆都好想我幫手打理屋企生意，後來佢見到我唔開心，都好支持我唱番歌，家我會以顧問身份幫屋企，話晒我都有三個女要養，我都希望畀到好嘅生活家人。」
採訪：李珮洳
攝影：仇志德
化妝：JessicaChan
髮型：Derel（P.O.P.）
服裝：izzue、DrMartens