土共大搞30蚊海鮮團、派200蚊畀人撐政改，八方同好多小市民一樣，嘖嘖稱奇。嘿！咪以為土共好闊佬，同浸大比較，八方夠膽講一句：望塵莫及。
做咗九年浸大校長嘅吳清輝，今個月底終於榮休，校內高層隆而重之，今晚喺會展舉行名為「敦學崇德，圖強惟新」吳校長榮休晚宴，筵開60席，恭請政務司司長唐英年主禮，場面盛大、衣香鬢影、星光熠熠，可想而知。
$800一位變免費
浸大上月初發出通告，表示街外人嘉賓出席呢個告別宴收800蚊一位，教職員獲校方資助，半價入場，為免向隅，呼籲大家盡快報名，通知校方有幾多人參加。事隔兩個幾星期，校方上月底再出通告，表示為鼓勵更多教職員歡送吳校長，同佢分享、回顧任內創新里程發展，又齊齊同吳校長夫人、千金、朋友及嘉賓真情對話論盡吳校長，所以校方決定益街坊、賣大包，教職員今晚可以免費參加榮休晚宴！
只要畀個名就可以免費食一餐，你話浸大係唔係闊綽過同鄉會、土共組織多多聲先！參加政制向前走大聯盟嗰啲着數團，飲飽食醉後必須去維園集會同遊行；歡送吳校長就唔同嘞，去會展食完一餐就可以起錨走人，唔使保持政治中立，冇任何附帶條件，有教授私下同八方講：「好過去撐政改遊行啦。」至於已畀錢嘅教職員相信會獲回水。歡送吳校長，浸大多多錢都捨得貼啦。
吳清輝喺浸大工作25年，校長任內建樹良多，臨別秋波，仍然有咁筍嘢造福教職員，所以八方奉勸浸大中人，唔好再針對吳校長退休後，轉任年薪200萬元、北京師範大學同浸大合辦嘅珠海國際學校校長嘞，由呢次告別宴安排可以見到，吳校長真係好努力為下屬爭取好處，點會謀私吖！
吳校長光榮起錨
除咗今晚呢場盛宴，浸大舊生會今個月24號都會搞歡送會，每位收費250蚊，校內線人透露，暫時未有消息校方會豪多次，另一條「針」則揚言，保證當晚全場爆棚，吳清輝光榮起錨。
mailto:[email protected]