書展就嚟，又係班o靚模賣青春、搵快錢嘅showtime，眼見周秀娜、Angelababy賺到上晒岸，呢班後生女當正佢哋係神咁拜，紛紛拋胸晒事業線，但有啲仲未攞成人身份證o架。其中兩位只得17歲、新8模成員之一嘅o靚模江怡（Betrys）同Joss，日前接受無綫節目《東張西望》訪問，分享做o靚模嘅點滴。不過唔講由自可，一開口就露晒底，俾網民插到飛起。
連主持都O嘴
o靚模Joss被問到點睇一夜情，答得仲有創意，搞到主持O晒嘴：「其實一夜情同盲婚啞嫁差唔多，不過係有一紙婚書，拜咗堂就洞房，一夜情就洞咗房先，唔係好大件事。」咁都講得出，馮仁昭真係佩服佢哋新思維模式。
願為吳彥祖破戒
而當主持問Betrys點解學人做o靚模，佢就話想搵多啲錢，等阿媽唔使咁辛苦，本來佢喊晒口都有幾分同情分o架，弊在佢加一句「個個女仔夢想都係追求名牌」，即時扣到負分。之後問由內地來港3年嘅Betrys點睇一夜情，佢起初又懶理智咁話未夠秤唔玩得，亦唔會去碼頭坐天光等人勾搭，點知突然靈光一閃咁話：「但係如果有個好似吳艷（彥）祖咁嘅靚仔行埋嚟，係女仔對眼都會變成心形，吳艷祖喎，會心郁o架！」