回想過去世界盃揭幕戰，對身為法國死忠嘅小弟嚟講，當然係02年最傷痛；嗰屆法國以衞冕身份喺南韓首爾，對住當時名不經傳嘅非洲球隊塞內加爾，結果出人意表下爆冷輸0:1。當年塞內加爾打到入8強，好似迪奧夫、卡馬拉、柏巴迪奧普自此名成利就，更先後登陸英超；可憐法國喺該屆就3戰不勝，兼冇波入情況下出局。
墨西哥有前冇後
因為衞冕球隊都要打外圍賽，上屆開始揭幕戰由主辦國出戰，德國仲大勝哥斯達黎加4:2；今次到南非主辦，對住墨西哥，國人對南非都冇咩期望，出線16強已經有晒交代。南非球員輕裝上陣，都係望有波入就收貨。
早前睇過墨西哥對意大利嘅熱身賽，見到呢隻「辣椒」攻擊力冇問題，但係防守就好一般，有啲有前冇後格，南非對墨西哥，一於冷敲入球「大」。文：牽牛
今日貼士
星期五1南非大
信心指數：★★★
註：5★最高