世界盃開鑼前夕，港股進一步轉靜，股海今個月餘下時間氣氛會點？唔少散戶都十分擔心，事關牛皮市況有時唔緊要，只要手上股份唔大跌，等踢完世界盃之後，話唔定可以重拾升浪。最弊就係個市牛皮，但手上股份卻出現洗倉式狂插，事關近期有唔少股份出現此情況，繼新奧燃氣（2688）及天能動力（819）後，散戶愛股騰訊（700）連日大跌，而且沽壓逐日漸增，情況並不尋常。
其實，早排唔少財經演員都曾推介騰訊，仲申報埋自己有貨，若然無吹水，咁咪要輸好多？散戶睇推介跟買，家陣都唔知點算？
仲有一隻要提防嘅大價股，就係濰柴動力（2338）。濰柴去年純利大升76%至34億元人民幣，但家陣沽貨力量唔理業績，濰柴昨逆市急挫7.1%，收報51.30元，出現第一支大陰燭，情況同上述幾隻大瀉股好類似，如50元大關一跌穿，去到咩位至停到真係唔敢講，有排都未使諗入市「起撈」，至於股友有貨在手，不妨趁早沽貨自保。
方星俠