發展局局長林鄭月娥對下屬要求甚高，下星期退休嘅常秘麥齊光卻獲佢盛讚，未退休就搵佢做兼職擔任支援四川重建小組組長，麥齊光噚日話已去四川17次，退休後又要遊山玩水又要去四川，「最困難係令自己唔好忙過未退休嗰時」。
麥齊光港大畢業後，73年加入政府，打一份工從一而終，公務員生涯三分二時間做鐵路工作，九龍鐵路電氣化鋪雙軌，佢做挖鑽筆架山隧道工作時，被石屎打崩一小角門牙。最難忘係76年大圍同沙田之間一道火車橋冧咗，由於當時鐵路係新界、九龍大動脈，內地食品南下港人「補給線」，所以要緊急重建，麥齊光與同事四出張羅重建物料，搵到剩餘物資鋼材同石屎躉，六星期重建了一半石屎、一半鋼柱嘅鴛鴦火車橋，條橋用至今日，記憶猶新。