旺角某茶餐廳，所傾所講，上至足球，下至牛油，都係大家心聲……
經紀陳：李老闆，世界盃今晚開幕，你就發啦！醒杯凍奶茶嚟得唔得？
李老闆：經紀陳，你係我哋十幾年熟客，請你飲杯嘢有咩所謂，但你睇我好，我睇你好咋！
經紀陳：個場咪幾旺。
李老闆：就算爆棚都冇用，裝幾個解碼器播直播波，已經用咗皮幾嘢，食物材料又日日起價；之前迫於無奈加價，已經俾你班熟客仔詐晒型，所以世盃都唔敢起價。而且以前只係同其他行家、酒吧爭客，家連商場都有免費波睇，好難鬥！
外賣仔：老闆，話時話，今晚我哋唔開OTo架，我約咗收銀妹去商場，我睇波，佢睇o靚模。
李老闆：你兩隻嘢想蹺起我呀？我預晒你哋頂埋尾場o架啦，最多畀多啲OT錢，一定多過「廿蚊張」。
洪興仔：李老闆，你冇人呀，我幫你吹雞，叫兩個o靚仔過嚟幫拖！
經紀陳：洪興仔，你哋做外圍o架喎，照道理忙過李老闆，點有人得閒呀？
洪興仔：阿大話皇氣呢排好緊張，驚有大龍鳳，所以叫我收一收先。
經紀陳：咁咪好大損失？
洪興仔：車，我哋做外圍，一年365日都有工開，少一日唔少，多啲時間睇波仲好。
經紀陳：咁你有咩心水先？
洪興仔：之前幾日收飛，都係墨西哥多，做到低水都好多客，跟飛買少少囉，不過記住去馬會落欖呀！