泰國出現20年嚟最嚴重嘅旱災，估計大米產量減少六成。泰國係主要大米出口國，香港入口嘅食米主要都係嚟自泰國，大米失收，米價自然貴，好「炒」嘅投資者當然喺市場搵相關受惠股。結果有個「米」字嘅就「得米」咯！金源米業（677）連升兩日，皆因佢係從事「米業」，米貴大家當然覺得「米業」嘅股價亦會跟住貴。
不過，金源主要業務係「從事搜購、入口、批發、精細加工、包裝、市場推廣及銷售食米；證券投資、物業投資及投資控股。」
食品股冇乜稻米生產商
撇除同食米無關嘅業務，簡單嚟講，金源並唔係稻米生產商，只係做食米貿易，米貴對佢嚟講唔可以話一啲都唔受惠，好似啲存貨就因為米價提升而水漲船高，不過要用較高成本入新貨，所以就算受惠，都係有限。
如果金源揩到邊都有人追捧，咁另一隻嘅升勢應該更凌厲！據呢家公司嘅年報描述，佢係「中國最大的大米出口商及國內領先的包裝米供應商，主要從事白米及蒸穀米貿易與加工」，呢家公司就係中國糧油控股（606），正所謂「唔怕生壞命，最怕改壞名」，同樣做食米貿易同加工，話之你係全國最大，股價只係「係咁易」升咗一日就支持唔住，同金源冇得比。
既然做貿易同加工唔算最大受惠者，股王A考敏妮，邊隻股先係食米生產商，敏妮摷咗多隻食品股嚟睇，中國食品（506）做酒類、飲料，食品方面得廚房食品即係食用油同調味品，另外仲有朱古力等休閒食品，唔覺有米！
至於超大現代（682）種菜嘅，中國綠色食品（904）做嘅新鮮農產品，只有長葱、甜玉米、西蘭花同白蘿蔔，又係冇米！究竟邊隻股係做食米生產，今次真係考起。
溫敏妮
http://wanmanli.com/blogs/