四年一度人生大事，今晚10點鐘正式開波！究竟係主場南非有氣勢，抑或啱啱喺國際友誼賽擊敗上屆冠軍嘅墨西哥稍勝一籌？Sorry！原來今晚要開OT，唔得閒睇；唔使失望悲到極住，今日教你兩招錄影辦法，免費數碼頻道又好，有線收費台亦好，只須插隻手指按個掣就搞掂，認真簡單！
記者：陳國輝
攝影：林栢鈞
Model：Pinky@PureModels
插HDD手指即錄無記
八點播開幕禮，跟住十點KickOff，老實講，呢啲黃金時間，唔係放工搭緊車返屋企，就係陪緊女友行街，首場揭幕戰唔錄唔得！但除咗用內置HDD嘅機頂盒來預校錄影，其實市面仲有一款內置錄影功能嘅iDTV，佢就係SamsungC7000。你只要將外置硬碟或一隻普通嘅HDD手指，直插落機背USB槽，就可立即錄影；但預校程序同一般錄影機唔同，佢只能夠揀選一星期內嘅節目嚟預錄，而唔係直接設定個開始及停止時間；另外，USB手指容量必須係16GB或以上，如果容量太細，部iDTV會辨認唔到o架！
C7000豈止錄影咁簡單？佢其實係香港市面第一部賣街的3D電視，仲可以將本來嘅2D畫面轉成為3D，筆者即場試睇一段足球賽事，立體感雖然唔及真3D，但如果搭上最巨型嗰款55"芒，效果超震撼。筆者再諗：用3D畫面睇越位陷阱，會唔會特別清楚呢？
兩款機頂盒專錄有線
至於想錄影收費賽事，就必須借助一個高清機頂盒。目前支援此項功能的有VDigiVDR系列，以及8仔嘅SM908。接駁方法相當簡單，如果你部有線機頂盒係用緊S-Video輸出，只須要轉駁至VDR嘅S-Video頭，再駁落電視機就搞掂晒。
另外Set台方式、預錄設定亦同一般機頂盒無乜區別。唯一要注意係，因為有線高清頻道加咗Protect，現時只能錄影有線嘅標清節目，至於所有高清賽事，仍只可作即場欣賞。
查詢：AVLife（68863398）