蘋果早幾日發表iPhone4成為全球熱話；佢嘅對手Google梗係唔會捱打啦，由佢哋開發嘅Android操作平台嘅合作夥伴三星出招應戰，包咗灣仔會展一個展館，公佈今日預售被譽為現時「最好、最快Android智能手機」GalaxyS。咁巴閉小妹當然唔會錯過，吸引咗成幾百人嚟睇新機，係香港近年少見嘅大型手機推介會。
GalaxyS鬥iPhone4
三星電子電訊產品總監陳柏煜現身展館舞台介紹手機。手機採用4吋全新SuperAmoled屏幕，睇片超清；機身超薄只有9.9毫米；內置記憶體16GB，可支援高達32GB記憶卡；500萬像素鏡頭，可拍720p高清片；電池壽命比其他智能手機高20%（佢好似講緊iPhone4喎）；配埋1GHz處理器，操作流暢。
陳總監話，GalaxyS可作智能響鬧，一瞓醒透過多功能簡報即時取得天氣、新聞等資訊。又可以透過DLNA技術無線連接電視分享靚歌、靚相同影片。SocialHub社群組合功能隨時上網處理電郵登入社交網站。小妹最鍾意Layer實境導覽功能，只需鏡頭捕捉身邊嘅環境，屏幕顯示有關店舖嘅電話等資料。
在場嘅百老滙董事長李子良話，呢部機同iPhone4有得鬥，率先賣搶埋頭啖湯㖭。新機售$5,588，今日起預訂，詳情瀏覽 http://www.samsungmobile.com.hk。
電郵：mailto:[email protected]