謝安琪（Kay）噚日喺灣仔出席一個慶祝回歸13周年活動嘅記者會，呢個「大型民族交響音畫（泰山）」活動由本月29日一路慶祝回歸到7月1日，除咗阿Kay做29號晚嘉賓之外，仲有黎明、千嬅喺唔同場次分別做嘉賓。阿Kay又話自己舊年都有出席回歸活動，今年再做嘉賓好榮幸。阿Kay話到時會同內地創作歌手徐子崴合唱，徐子崴喺內地好受注目喎。
返屋企即消毒
講起學友成家之前受腸病毒感染，搞到又屙又嘔，問阿Kay擔唔擔心？佢話：「惟有小心啦，同埋要做足清潔措施，其實我哋已經自行唔畀囝囝返學，停課一陣避一避啦。」乖仔張瞻上星期起已經自行停課，阿Kay原來對病毒都有啲研究，佢話：「啲病毒有周期性，過個幾星期如果都冇事就會消退o架喇。」
阿Kay又話有同囝囝解釋點解唔返得學，但係小朋友唔使返學日玩夜玩，似乎就唔識擔心喇。阿Kay同老公張繼聰日日都要四圍開工，佢話其實都怕將病菌帶返屋企，家惟有一返去就即時消毒，之後先同囝囝慢慢玩。