前日拍地成績理想，港股升過一浸，同日花旗股市顯著反彈，不過港股噚日朝早已冇力再跟，好彩晏晝內地股市大幅炒上，港股即刻生猛，恒指迅速挾高幾百點，不過恒指收市只升133點，期指仲要低水77點，睇嚟都係玩即市挾倉。無論如何，港股算係靠穩，今日可唔可以繼續推上，要睇花旗股市，又要睇A股嘅表現。
兗煤C輪20246：兗州煤業（1171）噚日報收16.04元，跌兩個位。股價挨近16元有明顯支持，反彈睇17.30至18元，可以諗吓隻C輪20246。隻輪現價12.2仙，2010年11月11日到期，行使價18.88元，溢價25.3%，引伸波幅52.1%，有效槓桿率5倍，正股升上18元，20246睇21.1仙，升幅逾7成，正股跌穿15.30元就沽咗隻輪。
俊樺