曼谷被紅衫軍搞咗一搞，小妹好多friends都轉軚走晒去台灣，雖然係咁，台灣觀光協會都唔敢放鬆，籌組歷年最大嘅旅遊代表團，參加今日一連四天喺會展舉行嘅國際旅遊展，仲大派觀光巴士券、電話卡，甚至機票。
揸旗嘅台灣觀光協會香港辦事處主任陳造明，啱啱先上任，佢話今年旅遊展台灣館主題係「旅行台灣．感動100」，迎接中華民國100周年。
攞埋旅遊卡着數多
港客嚟台灣館可獲贈包含旅館、餐飲等100項優惠嘅台灣旅遊優惠指南。持台灣機票、報團證或入台證到觀光協會攤位，獲贈台北巴士觀光一日證或高雄限量版電話卡一張；或即日起至8月31日期間到協會中環嘅辦事處，獲贈台灣一間遊樂場門券，「去年訪台港澳旅客約71萬人次，今年保守估計會升4%至75萬人次」。
行政院青年輔導委員會喺展場會推出青年壯遊台灣活動。代表顏均玲話，15至30歲嘅青年人喺會場免費申請青年旅遊卡，即獲贈刮刮卡，根據卡上密碼上網登入成為中華航空華夏會員，可以65折購買台北或高雄機票，「共送出2000套，其中4套會免費送台灣機票」。佢話青年旅遊卡本身好多着數，有800幾項景點門票、住宿等優惠，好似青年客棧提供平日優惠床位每晚新台幣500元（約港幣125元），TRPass鐵路優惠券喺有效期內不限次搭火車環島遊、手機免費借用等，詳情瀏覽 http://youthtravel.tw。
電郵：mailto:[email protected]