唔少人覺得經濟學係一門深不可測嘅學問，做每個投資決定前，都會先聽聽專家意見。但往往聽完都會堅持己見，叫你沽就走去買，問止蝕最後都死守唔放，然後就話專家老點。
部份投資者特別崇洋，聽到海外末世專家或基金大鱷嘅驚世預言，即時信到十足十。人哋口話金價要回，自己卻密密吸，散戶錯失入市良機，後悔信錯人已太遲，因為金價又再破頂創新高。
今晚聯儲局將發表全國經濟形勢調查報告褐皮書，仲有首次申領失業救濟金人數。正所謂盡信書不如無書，信數據不如信自己，其實憑自己嘅觀察力，一樣可透過日常生活洞悉經濟情況。
想了解消費情緒，唔使等周五零售銷售數字，睇經濟寒暑表麥記盤數就可知一二。陪住幾代人長大嘅麥當勞，點只係漢堡包咁簡單，佢涉獵嘅經濟階層甚廣，地盤工人食佢、OL怕肥都要買佢，有錢到好似以前林伯同小甜甜都鍾意食佢。
美消費改善 復蘇加快
麥記生意好壞，正好反映經濟復蘇步伐快慢。公司3、4月同店銷售分別升4.2%及4.9%，剛公佈嘅5月份數字增幅達4.8%，遠超市場預期。從年初開始，數據已反映多咗人出外用餐。仔細啲睇，最暢銷嘅主要係McCafe平靚正咖啡同一蚊雞（美金）早餐，可見慳錢仲係美國人大前提。
中產一族又如何？咪睇失業率保持9.7%咁高，就以為好多人冇得撈。低下階層的確繼續難搵工，但其實高收入人士失業率只係4.9%，即代表95%中產人士經濟能力都唔錯。之前提過潮流興「策略性斷供」，欠債唔還喺唔少美國人心目中唔係大問題，所以喺美國，樓蟹一樣可以大搖大擺大模斯樣行街購物消費。
金融海嘯後，唔少專家都預期美國人會將儲蓄率增至10%，但到今時今日都仲未發生，市場人士估計，儲蓄率目前頂多係3%。過度消費嘅習性未改，遲早會再引發經濟問題。美國絕招係開動印鈔機，足見其經濟霸主地位並非咁易被取代，增加消費有利經濟短期復蘇，所以財長蓋特納至會呼籲日本同德國等應全力鼓勵消費。
胡孟青