獅王回歸勢不可當！響浦東陸家嘴嘅滙豐中國新總部大樓，噚日由行政總裁紀勤主持啟用禮，除咗獅子行班高層空群出動，連上海市副市長屠光紹都現身，仲有新地（016）都派出執董陳國威嚟撐場！原本副主席郭炳聯都話嚟，但好似唔見人。點解關細K事？皆因獅子行新總壇扎根地就係喺新地棟物業入面，獅王仲買起埋22至38樓連命名權㖭！
講番獅子行呢個響浦東香格里拉對面、毗鄰東方明珠塔兼雄踞黃浦江邊嘅新總部，可謂獅子行喺神州嘅第三代總壇旗艦，咁點解唔諗諗用番以前第一代據點、1865年獅子行誕生地外灘呢？路邊社消息話，獅王確實係咁諗過，不過市政府叫價太高，精打細算嘅獅王當然「唔食回頭草」，最終，嗰幢充滿大上海東方華爾街色彩嘅舊址，俾浦發行買咗嚟用，所以獅王先要轉場去浦東搵食囉！
李華華