餓咗咁耐，我哋終於等到啦！2010世界盃聽晚開波！話係話今年多咗3D轉播，但論氣氛又點及現場睇過癮？加上南非人到處載歌載舞，立即睇波無國界一齊投入賽事。今日醒你四個tips出門去南非睇波，家上車都未遲！
記者：曾冠輝
圖片：FIFA官方提供
Tips1
Tailor-made隨隊睇套票
南非，係一個國家，唔係一個城市，即是話，要跟隨心儀球隊由頭支持到尾要遊走多個城市至得。今屆世界盃10個場館設於南非9個城市，單是分組賽每隊球隊都要到3個不同城市作賽，例如：若然你是香港大多數（突首，呢個先係真正香港大多數呀！）的英格蘭球迷之一，想到現場為球隊吶喊助威，便要先到勒斯滕堡（Rustenburg）睇英美大戰，再到開普敦（CapeTown）遇上阿爾及利亞，然後在伊莉莎伯港（PortElizabeth）決戰斯洛文尼亞，進入十六強之後仲要……假若英格蘭一個唔覺意入咗決賽，追足7場你就要在城市與城市之間走足6次，訂內陸機票、酒店、撲飛都夠你煩啦！
簡單啲，阿聯酋航空推出度身訂做世界盃套票，只要諗定要睇邊幾場賽事，訂到波飛之餘，仲可以安排埋內陸機票及酒店住宿，連酒店至球場交通都可以預先安排，一站式搞掂晒。而我這種少數的西班牙球迷，篤信呢位鬥牛勇士點都殺得入決賽，仲可以簡單啲同旅行社講：「我捧西班牙！」便可以一次過預訂7場門票（當然要有錢人先做到啦！）跟住球隊由6月16日第一場對瑞士睇到入決賽捧盃。係呀，係決賽呀，至截稿日電話詢問旅行社，話仲有決賽飛可訂，方便得嚟仲唔使辛苦撲飛！
阿聯酋航空世界盃套票
包括：阿聯酋航空來回南非（開普敦/德班/約翰內斯堡）機票、最少三晚酒店住宿及最少一場自選球賽門票
費用：以一場分組賽+機票、住宿，$31,100起；決賽（飛約翰內斯堡連住宿）則$44,476起
查詢：39600333（美麗華旅遊）
網址： http://www.emirates.com/hk（阿聯酋航空）
Tips2
FanPark免費睇
如果你係遲咗出手，訂唔到波飛的話，請你唔好慌，唔好亂，因為真的假不了……唔係叫你炒黃牛，而係話你知要睇波唔一定要入球場，場外一樣精采有氣氛。
自上屆德國人想出，在球場外設fanparks讓買唔到飛或買唔起飛入場的球迷，除了一窩蜂湧到酒吧外，在戶外一樣可以投入盛事，為自己心愛球隊打氣。其後國際足協更制訂FIFAfanparkpolicy，規定fanparks內有巨型銀幕配合一流音響及燈光直播賽事，仲要有表演節目助興，兼有DJ駐場打碟，氣氛唔會輸畀比賽現場。今次南非各大比賽城市一樣設有fanparks，場地雖可容納30,000人，但由於入場費用全免，所以人一定多到滿瀉，要去記得趁早。
Tips3
出門學定DiskiDance
南非人最愛唱歌跳舞，世界盃咁大個party點會唔跳番part舞。大會為世界盃特別排了一隻DiskiDance，將足球腳法結合舞蹈，踢住個隱形足球跳跳吓。齋講抽象，立即click入網，影片教學逐part學，學識先至好出門，到時無論你喺場內或場外的fanpark，都可以同當地人一齊跳，打破言語隔膜。
網址： http://www.southafrica.info/footballfridays/diski-dance2.htm#
Tips4
大學宿舍變酒店
事前好多人質疑：世界盃咁大件事，南非到底搞唔搞得掂，情況如同當年北京奧運。場館方面倒不擔心，事必日夜趕工點都要埋尾好好睇睇。我反而關心住宿，突然一下子全世界湧到南非到底夠唔夠地方住？開新酒店嗎？完事後換來人少拍烏蠅極不化算。南非政府都幾醒，識得利用大學宿舍迎賓，約翰內斯堡、開普敦及德班的大學總共提供9,000個房間，6月頭起開放予遊客。怕環境、服務差？唔怕，宿舍由酒店集團管理，餐飲服務、娛樂設施統統有齊，價錢仲幾合理㖭。
大學住宿
房費：單人房$627，雙人房$741
參與大學：UniversityofCapeTown、UniversityofJohannesburg、WitsUniversity、UniversityofKwazuluNatal
網址： http://www.saguidedtours.co.za（click "2010SoccerWorldCup"）
南非其他住宿參考網址： http://www.rooms4u.travel
GoGoalS.Africa
溫馨提示：基於治安問題，南非始終不宜獨自旅遊，特別是晚上，最好結伴3-4人出遊。
TravelMemo
持BNO或特區護照免簽證。南非領事館：25773279
1港元約兌1蘭特（文中價錢已折算港元）
230V，三圓腳插座
南非 開普敦
下周天晴，11-21℃
