「証（證）明當天的決定是對的……」12項香港游泳紀錄保持者、「女飛魚」蔡曉慧噚日喺微博留下呢句話，同時貼上「足球先生」陳七拍起錨廣告、遭fans狂批而感到不安嘅報道，顯然對自己避過一劫而鬆口氣。
八方噚日問蔡曉慧，佢承認幾個星期前政府搵佢拍撐政改方案起錨廣告，由於唔係好清楚政改方案內容，所以婉拒咗。「自己唔係好清楚件事，咪唔拍囉。」陳七上鏡後話唔代表支持方案，強調政治中立，蔡曉慧亦唔肯表態，「其實我保持中立好啲啦，唔係一定要有個standpoint。」
不怕被列「黑名單」
陳七起錨變拋錨，俾fans鬧到飛起，有人更聲言要退出南華球迷會，八方問蔡曉慧同唔同情陳七，佢話不宜評論，卻有個忠告，話有啲事「唔知就唔好夾硬去做。」政府鍾意搵形象健康運動員做代言人，蔡曉慧做過青少年活動大使，又係奧運聖火火炬手，今次唔肯起錨，八方怕佢被列入「黑名單」，佢覺得冇問題，「我唔係好強烈拒絕佢。」
蔡曉慧係女拔精英，美國加州柏克萊大學高材生，政治智慧果然高幾班，只係識花錢造勢嗰啲運動員經理人，真係要學吓嘢。第二輯起錨廣告唯一女主角前新聞之花黃德如，原來係疑似次選，另一新聞之花（過去式）張寶華原來都接獲政府邀請，預佢一份上鏡撐政改，不過張寶華唔多認同政改方案，無謂歸邊，所以sayno。
小道消息話政府接觸過幾個女主播，連食多個檸檬，幸好黃德如幫忙，真係多謝晒。話說回來，咁多人唔肯挺政改方案，唔願意同高官一齊起錨，呢個方案係咪真係政府所講咁多人支持呢？陳七做完官方代言人，轉頭卻話自己政治中立，「足球先生」腳頭勁、骨頭軟，香港足運還有甚麼前途？
陳七被指波政不分
陳七家陣先話自己政治中立，可能為時已晚，好多球迷批評佢利用球星身份做政治宣傳，簡直波政不分，要求南華班主羅傑承道歉，一個廣告搞到南華拋錨，今鋪真係超錯嘞。
mailto:[email protected]