八方噚日公開網民開出嘅議員轉軚支持政改盤口，瞬即成為政圈話題，幾乎人人手持賠率表研究盤路，被視為轉軚「三甲之選」嘅張國柱，噚日話自己冇可能係大熱門，「我都好奇怪，點解我得3.5倍！」
八方叫佢自開賠率，睇佢有冇膽開自己999倍大冷，點知張國柱唔肯，只係話社總內部唔少人都屬堅實民主派，「好多社工仲講緊2012雙普選，我都投降啦。」不過佢不忘指出，一切有待社總21日開會投票，自有分曉。賠率熱過張國柱嘅李國麟，噚日笑言唔知有冇人做莊，「如果有人做莊，我即刻買！」金牌莊家詹培忠話睇淡方案唔通過居多，開盤盞俾閒家煲爆，博唔過。