政府總部幾乎每個星期日都有遊行示威，添馬艦新政府總部明年中落成，到時示威者都要轉移陣地。新政府總部設計概念「門常開」，幾幢大樓之間有片草地休憩區，示威請願少則一百幾十人參加，多起上嚟50萬人都試過，如果人數眾多，呢塊綠地毯隨時遭殃；投得工程嘅金門建築營運總裁黃唯銘噚日同八方講，正選擇鋪邊種草皮，首要條件梗係唔好咁易踩謝，佢透露揀咗四種草測試，每日會搵個150磅以上嘅人上去行吓，睇吓邊隻草最唔襟行，由於測試需時，暫時未有心水。
從未做過同類測試
金門做過好多大型工程，黃總裁話從來未試過要做呢種測試，所以佢都幾緊張。金門建築係業界龍頭之一，黃總裁話佢哋有地盤試行向工地人員提供制服，部份工地更設吸煙房、冲凉房，晨早會齊齊做早操，夏天又會煲凉茶畀工人飲，表現好嘅員工會獲贈購物贈券或現金，福利咁好，都希想吸引新人入行啫。