曾特首上街派傳單，高呼「起錨起錨起錨」，另有一派人搞對抗，大嗌「超錯超錯超錯」。起錨、超錯之聲，此起彼落，連坐在梳化睇電視嘅左丁山都大呼過癮過癮。後來學生豪來電詢問：「起錨、超錯，有冇出處o架？」
為咗唔想教錯細路，查吓先。「起錨」就容易啦，係行船、航海用語，英文叫做weighanchor，即係將放在海床嘅錨（anchor）提升上番船面，輪船航行啟動前，首先開動引擎，跟住起錨，航行出海。美國海軍軍官學校在1906年打美式足球，大戰美國陸軍，當時就作咗一首打氣歌曲，叫做《AnchorsAweigh》。航海係外國人叻啲嘅，中國自從明朝鄭和死後，就開始鎖國，不准出海航行，此後幾百年，乜嘢叫做海軍都唔識，故此講航海術語，要從英文學起（我哋冇邊幾個識得葡文、西班牙文、荷蘭文啩？），英文起錨就係預備啟航、開船嘞咁嘅意思。
咁拋錨嘅英文又係乜：諗咗一輪，唔通係dropanchor？唔敢肯定，隨手搵書架上嘅《各行各業萬用英文手冊》（一九八八年版），在船舶篇（145至154頁），搵到拋錨就係Letgo，咦，乜咁簡單嘅，唔敢信住，上網搵吓，卒之搵到美國阿拉斯加最高法院嘅判詞，有Letgoanchorchain，算係拋錨嘅正式用字，大概船上水手拋錨之時，冇人講Letgoanchorchain嘅，大聲嗌一句Letgo就算。呢本《萬用英文手冊》刊載一啲老翻譯，幾有趣，例如水手長Boatswain，正水手A/B，即Able-bodied，老水手Shellback，水手OrdinarySeaman。
「起錨」在香港廣東話嘅意思除文雅啲嘅「啟航、開船」，俗啲嘅有「走人、鬆人、走嘞」之外，更俗啲就係「撇嘞、閃」，甚至係着草。（比較牽強啲啩？）
至於「超錯」一詞，左丁山笨笨地，相信係純粹出於網上惡搞，中文本無此詞，不過香港潮流興講一個「勁」字，與「超」字，譬如幾個月前一位小朋友問左丁山有冇字句形容「薄」（thin），左丁山不假思索，話「薄如蟬翼」，小朋友皺晒眉頭，話未聽過，拜拜而去。幾個禮拜後碰到佢，問佢卒之用甚麼字句形容「薄」，小朋友笑曰：「嗱，易啦，我寫咗『超薄』，夠晒簡單，人人明白！」哦，咁講法甚麼都可以「超」，故此批評人哋錯誤，可以話人「超錯」，如果中文老師要扣分嘅話，學生騷動都似！