昨日講起民主女神像與中大學術水平一事，左丁山認為不可混為一談。舉個好簡單嘅例子，你鍾意徐立之，就話徐立之學術水平高，你唔鍾意劉遵義，就話劉遵義學術水平低？得唔得呀，如果你認為得，水平低嗰個就係你。徐立之與劉遵義兩位校長同在國際學術界享有聲譽，一個係基因專家，一個係經濟專家，但兩人治校嘅作風唔同，各有所好，不過中大人素來勇於發言，自由到極，香港嘅大學之中，只有中文大學嘅歷任校長在校時一一被痛駡過，無一倖免。好人如高錕，當年咪一樣被人駡得厲害。
中大行政與計劃委員會（AAPC）有二十九名成員，除四名行政人員外，其他全是著名教授，包括諾貝爾獎得主，中國科學院院士，美國科技界著名學者，台灣知名歷史學家等等，純講學術嘅話，可說陣容鼎盛，無知人士話中大學術水平低，真乃夏蟲不可語冰。
至於AAPC不記名投票，決定「民主女神像」不宜在中大校園永久擺放一事，根本與學術水平無關，各人可有不同意見，左丁山接觸之中大校友之中，有人贊成，有人反對，有人無可無不可，意見並不統一；以中大人之勇於發言風氣，有贊成嘅校友因而痛駡AAPC，並不出奇，如果冇，先至係奇哉怪也。一位校友係太極高手，人人知道佢打太極有真功夫，但佢嘅太極功力與做中學校長嘅功力有無關連呢，當然係冇！但如果有人話佢做中學校長之時出現學生犯罪事件，係「九流校長」，順便批評埋佢嘅太極唔掂，梗係荒謬o架啦。
一位中大二年級生，生於一九八九。阿媽大肚之時，有參加六四遊行。有此胎教，呢位學生X入中大之後，亦熱情參加六四靜坐及學生會活動，六月五日凌晨回到大學火車站參與豎立「女神像」。左丁山問佢一般同學如何，學生X話：「好難估o架，平時我哋在Facebook搞群組搵同學參加一啲活動，報名人好多，真係到場參加嘅比例，往往少過一半。書院學生會好難好難搵人上莊，中大學生會好一啲，但校園內沉默大多數真係好大嘅多數，好難知道同學嘅主流意見。」咁講法，中大學生會嘅真正代表性如何？學生X話：「從來都冇人挑戰過，咪當佢代表學生囉！」