火辣淑女370Z　踭趾唔使學

火辣淑女370Z　踭趾唔使學

日產Fairlady370Z淑女回歸，渾圓車身加勾形頭尾燈，幾有定力嘅男人都被佢吸引住。靚同性能都唔錯，不過熱愛玩車之人，始終念念不忘踭趾（HeelToe）拖波玩法。棍波版370Z熱辣到港，飄移王James試走兩轉，結論居然係：識自動補油，連初哥都做到踭趾效果！

記者：徐影龍
攝影：譚盈傑

自動補油Keep轉數

細細個睇成龍套《霹靂火》，見到佢同盧惠光兩條友，左腳踩極力子轉波，右腳就打橫放，油門、迫力一齊踩，型到我個蛋撻頭都識「動L」。呢種技巧名為HeelToe，俗稱踭趾，作用係收車轉波時，為求保持引擎高轉速，所以一邊煞掣一邊「呼空油」，可算係棍波車好玩地方之一，十幾年前無知嘅我當然試過，可惜手腳唔協調，搞到架車窒吓窒吓兼死火收場。日產Fairlady370Z就體貼一班唔係車手嘅用家，最新棍波版就加入自動補油功能，喺轉波之間自動自覺幫你補油，令到每個波段銜接順暢之餘，亦Keep住高轉數喺手，的確毋須玩踭趾，都可發揮到棍波370Z嘅狂野好玩之處。

我就極欣賞呢個設計，著名飄移車手JamesTang試走大清兩轉後，評語係：「太簡單喇，就算唔係車手都做到踭趾。不過我就唔多慣，都係自己做實在啲，始終有小小分別。」自動補油設有開關功能，唔鍾意咪Off咗佢囉！

■新版魚勾形頭燈，同車身線條完美融合。

■3.7LV6引擎，令馬力達到333匹。

有歐洲跑車級數

玩棍只係錦上添花，370Z喺日本既然有「惡魔之Z」嘅稱號，性能表現當然有番咁上下。採用全新「VQ37VHR」V6偈，細細架車引擎容積卻高達3,696cc，最高馬力達到333匹。James對其他部份都好滿意：「軚感好，路面訊息傳遞得好清晰。制動效果有驚喜，落雨天路面濕滑，但HardBrake一樣收放自如，輪胎同制動『溝通』得唔錯。」

■內櫳以黑色為主，配上幾處銀色裝飾，更具豪華感。

「至於外形方面，圓潤得嚟依然保留到跑格，有種歐洲高級跑車嘅味道。我最欣賞寬敞及偏低嘅擋風玻璃，車手視線更集中喺前面，感覺上更有揸跑車Feel。內櫳都不俗，揸同坐都幾OK，黑色內櫳唔係差，若換上紅黑TwoTone就更Perfect喇。」

■尾廂容量唔算大，不過勝在夠深。

■未採用仿桶椅設計，勝在令人坐得更舒服。
　

■六速棍波手感極佳，上方可啟動「自動補油」功能，夠就手。

■中控台上方為三細圓儀錶，保留Fairlady傳統風味。

■雖非紅底白字，但錶板仍滲出濃烈跑車味道。

NissanFairlady370Z規格

引擎：3,696ccV6
馬力：333PS/7,000rpm
扭力：37.0kgm/5,200rpm
傳動：六速手動波箱，後驅
售價：$569,800
查詢：合誠汽車（22621088）

■渾圓尾部並無懶可愛感覺，反而有點歐系跑車Feel。