亞洲出版業協會一年一度卓越新聞獎噚晚頒獎，《蘋果》今年成績唔錯，〈人類豬流感系列〉攞到卓越新聞攝影獎，〈旺角小巴衝上行人路兩死八傷車禍〉則奪得卓越資料圖像獎；台灣《蘋果日報》方面，〈陳水扁囚裡放風〉攞到新聞攝影優異獎，〈鐵皮屋堵生路〉得資料圖像優異獎，《惡水無情，人間有愛》奪報版設計優異獎。
本屆年度記者獎由《亞洲週刊》張潔平奪得，大會讚揚佢無懼深入報道內地敏感新聞。去年六四事件20周年，好多傳媒花心力發掘出唔少多年來不為人知嘅內幕，《亞洲週刊》追查〈黃雀行動香港人捨命救危〉內情，取得獨家新聞優異獎，《信報月刊》六四20周年專題報道獲特寫新聞優異獎。卓越新聞獎今年設85個獎項，共有564份作品參賽，係歷年新高。
大會邀請菲律賓《Newsbreak》雜誌主編MaritesDanguilanVitug做演講嘉賓，佢以敢言見稱，新書《ShadowofDoubt:ProbingtheSupremeCourt》爆菲律賓最高法院醜聞，一度受死亡恐嚇。