隔晚花旗股市繼續跌，不過噚日港股就反覆上升109點，多得拍地成績理想，何文田塊地每方呎賣超過1.25萬元，麪粉價貴過麪包價，對樓市同地產股都有正面刺激。
不過外圍氣氛嘛嘛，港股成交只有436億元，認真靜，後市嘅方向仲未明朗，仍要睇歐洲債務危機嘅變化同花旗股市走勢。
長實C輪22729：長實（001）噚日報收87.70元，升1.7%。雖然投唔到地，但係樓盤同股價都會得益，股價升破88.60元睇92元，可以諗吓隻C輪22729。隻輪現價22.5仙，2010年11月30日到期，行使價104.80元，溢價22.1%，引伸波幅30.8%，有效槓桿率9倍，正股升上92元，22729睇33.7仙，正股跌穿85.50元就沽咗隻輪。
俊樺