大宗收購合併，就有如情侶拍拖，最後能否走進教堂踏上紅地毯說聲「我願意」，除了誠意與作價，時機亦是關鍵。
保誠（2378）收購友邦保險（AIA）失敗，要白白畀4.5億英鎊「掟煲費」，行政總裁譚天忠死口話作價合理，可惜AIA背後有高人撐腰，董事會有中投、淡馬錫等主權基金戰略投資者支持，認為IPO上市肯定可以集資多過保誠建議嘅303億美元。
以現時市場環境，加上資金有外流迹象，是否真如AIA阿媽AIG算得咁樂觀，實在令人懷疑。大家有眼見農業銀行上市都一波三折，一旦市況再轉靜，令AIA上市計劃遇阻甚至延遲，對公司肯定係雙重打擊，最大得益者又係投資銀行財務顧問，食盡兩家茶禮。
市況轉靜，最賺錢唔係靠玩收購合併，而係市旺時較難處理嘅重組同私有化。太古（A，019）分拆地產業務唔成，但重組步伐冇停手，以每股105元向國泰航空（293）全購港機工程（044），溢價25%。呢個作價正係港機今年初股價，太古趁市淡做重組，時機配合得天衣無縫。交易完成後，港機強勁現金流，將喺太古賬目內綜合入賬，加上作價合埋，太古又可增加一項核心業務。
和記港陸諗得過
趁股價低迷，將公司私有化亦是不錯的選擇。最新有廣汽修訂私有化駿威汽車（203），可獲廣汽H股嘅換股比率，作價變相提高25%。雖然私有化後仲要等介紹上市，令真正作價存在較大變數，但以現時市況，其實駿威嘅基金股東都應該收貨，否則拖落去私有化唔成仲蝕。
李超人話長和系抵買，亦身體力行密密增持，令人期待下一單大動作。和記黃埔（013）完成私有化和電國際後，係時候諗諗和記港陸（715）。公司近年不停賣資產，繼08年出售上海物業後，今年3月又賣咗手機配件業務，家陣剩番上海海陸廣場同港陸黃浦中心收租，同做華納產品、世界盃吉祥物等採購業務。私有化最大嘅誘因，係賣咗上海物業後，去年公司淨現金59.48億元，他日更可賣埋餘下物業。股價跌至現水平，已相當於公司嘅現金水平，股價自年初高位1.48元跌逾一半，抵買。
胡孟青